സൌഹൃദത്തിന്റെ മരണങ്ങള്‍

സൌഹൃദങ്ങള്ളുടെ ജനനം പലവിധമുള്ള പോലെ തന്നെ സൌഹൃദങ്ങളുടെ മരണവും പലവിധമാണ് കാര്‍ഡിയാക് അറെസ്റ്റ്‌ പോലെ ഒറ്റ നിമിഷംകൊണ്ടുള്ള മരണമുണ്ട് ,ഇനിയൊന്നു സാവധാനമാണ്‌ വാര്‍ധക്യത്തില്‍ മെല്ലെ മെല്ലെ വരുന്ന മരണം പോലെ കത്തുകളും ഫോണ്‍വിളികളും കുറഞ്ഞു കുറഞ്ഞു വരും.....
ജീവിതം പറയാനും കേള്‍ക്കാനുമുള്ളതാണെന്നു പഠിപ്പിച്ചത് ഒരു സുഹൃത്തായിരുന്നു, ഞങ്ങളുടെ സൌഹൃദമായിരുന്നു ആ പാഠം പകര്‍ന്നു തന്നത്, പക്ഷെ മുകളില്‍ പറഞ്ഞതുപോലെ ആ സൌഹൃദത്തിന് കാര്‍ഡിയാക് അറെസ്റ്റ്‌ മൂലം പെട്ടെന്നൊരുനാള്‍ മരണം സംഭവിച്ചു,

വര്‍ഷങ്ങള്‍ക്കു ശേഷം അതേ സൌഹൃദം വീണ്ടും പെട്ടെന്നൊരുനാള്‍ പുനര്‍ജനിച്ചു വന്നു, ഇടിയും, മിന്നലും ഒപ്പം തുള്ളിക്കൊരുകുടം എന്നപോലെ പെയ്തുമായിരുന്നു അത് പുനര്‍ജനിച്ചു വന്നത്, ആ പെയ്ത്ത് കുറച്ചു നാളേക്ക് നീണ്ടു നിന്നിരുന്നു, അപ്പോഴും അറിയാമായിരുന്നു ഈ പെയ്ത്ത് എപ്പോള്‍ വേണമെങ്കിലും നിലക്കാമെന്ന് ,കരുതിയിരുന്നപോലെ തന്നെ അത് നിലച്ചു പക്ഷെ ഇത്തവണ കാര്‍ഡിയാക് അറസ്റ്റ് ആയിരുന്നില്ല മെല്ലെ മെല്ലെയുള്ള മരണമായിരുന്നു അത് ,
ഇപ്പോള്‍ ഇടക്കൊക്കെ ഒരു പുഞ്ചിരികൊണ്ടു ആ സൌഹൃദത്തിന്റെ ജഡത്തിനു പുഷ്പചക്രം സമര്‍പ്പിക്കാറുണ്ട് ഞങ്ങള്‍........